តើស្ត្រីដែលលើសទឹកភ្លោះក្នុងអំឡុងពេលមានផ្ទៃពោះអាចប្រឈមផលប៉ះពាល់អ្វីខ្លះ

January 8, 2019

លើសទឹកភ្លោះនៅក្នុងអំឡុងពេលមានផ្ទៃពោះសំដៅលើការកើនឡើងនូវកំរិតទឹកភ្លោះនិងក្នុងផ្ទៃរបស់ស្ត្រីលើសពីកំរិតធម្មតាដែលវាគឺជាហានិភ័យមួយនៅក្នុងចំណោមហានិភ័យជាច្រើនទៀតដែលអាចប៉ះពាល់សុខភាពម្តាយនិងទារកដែលកំពុងលូតលាស់នៅក្នុងផ្ទៃ

ចំពោះស្ត្រីនៅក្នុងអំឡុងពេលមានផ្ទៃពោះដែលប្រឈមនិងទឹកភ្លោះលើសកំរិតអាចធ្វើការកត់សំគាល់តាមរយៈសញ្ញាមួយចំនួនដែលរួមមានដូចជា៖

• ពិបាកក្នុងការដកដង្ហើម
• មានអាការៈហើមបរិវេណផ្នែកខាងក្រោម
• ហើមនៅបរិវេណប្រដាប់បន្តពូជ “បបេខាងក្រៅ”
• នោមតិច
• មានអាការៈទល់លាមក
• រលាកក្រពះ “ក្តៅក្រហាយចុងដង្ហើម”
• មានអារម្មណ៍តឹងណែនពោះ

ផលវិបាកដែលបណ្តាលមកពីការលើសទឹកភ្លោះនៅក្នុងអំឡុងពេលមានផ្ទៃពោះអាចបណ្តាលអោយប៉ះពាល់សុខភាពនិងការលូតលាស់របស់ទារកនៅក្នុងផ្ទៃដូចជា៖

• ទារកកើតមិនគ្រប់ខែ ឬមិនគ្រប់គីឡូ
• ទារកលើសគីឡូ
• សុកពាំងមាត់ស្បូនដោយផ្នែកឬទាំងស្រុង
• ធ្លាក់ឈាមក្រោយសំរាល
• ទងសុកធ្លាក់ចេញមកក្រៅមុនពេលទារកសំរាល
• ទារកកើតបញ្ច្រាស់
• ទារកស្លាប់ក្រោយពេលសំរាល

ក្រៅពីសញ្ញានិងហានិភ័យដែលអាចបណ្តាលមកពីការលើសទឹកភ្លោះនៅក្នុងអំឡុងពេលមានផ្ទៃពោះយើងក៍មិនត្រូវមើលរំលងនូវកត្តាចំបងមួយចំនួនដែលជាប្រភពដែលនាំអោយលើសទឹកភ្លោះផងដែរ កត្តាទាំងនោះមានដូចជា៖

• ទារកវិវឌ្ឈន៍មិនប្រក្រតី “មិនគ្រប់លក្ខណៈពីកំណើត”
• ស្ត្រីជាម្តាយលើសជាតិស្ក “ជំងឺទឹកនោមផ្អែម”
• ទារកភ្លោះ2ឬលើសពី2នៅក្នុងផ្ទៃតែមួយ
• វិបត្តិដំណរពូជ
• ជំងឺស្លេកស្លាំងបណ្តាលមកពីវិបត្តិឈាម “ប្រភេទឈាមរបស់ស្ត្រីជាម្តាយនិងទារកនៅក្នុងផ្ទៃខុសពីគ្នា”

សំគាល់៖ស្ត្រីនៅក្នុងអំឡុងពេលមានផ្ទៃពោះគួរគាប្បីពិនិត្យពិគ្រោះជាមួយគ្រូពេទ្យជំនាញនិងទទួលទានអាហារូបត្ថម្ភរក្សាគភ៌អោយបានទៀងទាត់