ស្ត្រីទើបសំរាលកូនដំបូងដឺងពីវិធីសាស្ត្របំបៅដោះទារកដែរឬទេ…
ការបំបៅទារកជាមួយទឹកដោះម្តាយគឺជាវិធីដែលល្អបំផុតសំរាប់សុខភាពទារកនិងម្តាយជាពិសេសវាបានបង្កើននូវភាពស្និទ្ធិស្នាលរវាងអ្នកនិងទារករបស់អ្នកផងដែរ។ ចំពោះការបំបៅដោះទារកជាលើកដំបូងវាអាចជាការលំបាកបន្តិចសំរាប់អ្នកម្តាយប៉ុន្តែក្រោយពេលអ្នកសាកល្បងអនុវត្តជាច្រើនសារួចមកវានិងជួយអោយអ្នកមានអារម្មណ៍ធូរស្រាលនិងរីករាយជាងមុន
វិធីសាស្ត្របឋមនៃការបំបៅដោះ
- ដាក់ទារករបស់អ្នកអោយជាប់ជាមួយនិងអ្នកតាមដែលអាចធ្វើទៅបាន (សាច់ប៉ះជាមួយនិងសាច់)
- ស្វែងយល់ពីសញ្ញាដែលបញ្ជាក់ថាទារកឃ្លានមានដូចជា ទារកដាក់ដៃចូលក្នុងមាត់ ទារកជញ្ជក់មាត់ និងទារកស្រែកយំ ទាំងនេះជាសញ្ញាបឋមដែលទារកបង្ហាញចេញពេលឃ្លាន
- ការបំបៅដោះនិងជួយអោយម្តាយអាចផលិតទឹកដោះបានច្រើននិងរហ័សជាងមុន និងការពារជំងឺមហារីកដោះផងដែរ
- ទារកអាចនិងត្រូវការបំបៅដោះចំនួនចាប់ពី៨ដងទៅ១២ដងក្នុងរយៈពេល២៤ម៉ោង
ដាស់ទារកពីដំណេក
ក្នុងករណីខ្លះអ្នកត្រូវដាស់ទារករបស់អ្នកពីដំណេកដើម្បីបំបៅដោះ ប្រសិនជាទារករបស់អ្នកមិនយំឬរកអាហារ។ វិធីងាយៗនិងមានភាពសមស្របសំរាប់ដាស់ទារកក្រោកពីដំណេកមានដូចជា៖
- លើកទារកចេញពីកន្សែងរុំ រួចដាក់ទារកភ្ជាប់ជាមួយទ្រូងម្តាយ “សាច់ប៉ះនិងសាច់”
- និយាយជាមួយ ឬអង្អែលផ្ទៃមុខរបស់ទារកថ្នមៗ
- លើកទារកអង្គុយបញ្ឈរដោយជួយទប់ពីក្រោយ និងអង្អែលខ្នងរបស់ទារកដោយថ្នមៗ
- ច្របាច់ថ្នមៗលើដើមដៃនិងចុងជើងរបស់ទារក
- ផ្លាស់ប្តូរខោទឹកនោម ទោះបីជាមិនទាន់ពេញក៍ដោយ “ការប្តូរខោទឹកនោមក៍អាចអោយទារកភ្ញាក់ដែរ”
- ប្រើក្រណាត់សើម (ក្តៅអ៊ុនៗ) ជូតខ្លួនទារក
សំគាល់៖ស្ត្រីនៅក្នុងអំឡុងពេលមានផ្ទៃពោះនិងក្រោយសំរាលគួរគាប្បីធ្វើការពិនិត្យតាមដានជាមួយគ្រូពេទ្យជំនាញនិងព្យាយាមទទួលទានអាហារូបត្ថម្ភអោយបានគ្រប់គ្រាន់
